Elena Gheorghe

Elena Gheorghe, 2013

Elena Gheorghe (n. 30 Alunar 1985) easti unã cãntãtoari di-tu Romãnia, cu zãrtsini armãneshtsã.

ELENA GHEORGHE

Cãnãscuta cãntãtoarã a cãnticlui armãnescu, Elena Gheorghe dit Bucureshti, Romãnii, (di tatã Armãnã), easti faptã pi 30 di alunar, anlu 1985. Pi stsenã, ti prota oarã inshi cãndu umplu trei anj, deadun cu aljei mamã. Cãndu s-dutsea tu clasa tsintsi, s-angrpsi la Palata Natsionalã a Ficioritslor, iu loa lectsii di canto, a dupu atsea eara solistã la Tsercljul Aromania, cu cari ari loatã parti la ma multi concursi, shi s-dutsea pi turnei pit vãsiliea tutã. Pi 16 di anj, ca nai ma tinirã cãntãtoarã partitsipã la festivalu Mamaia, cu cãnticlu „Dau bana a mea”. La liceulu di muzicã „Dini Lipati” studieadzã ti actrisã shi canto clasic. Di la anlu 2003 easti solistã a grupãljei „Mandinga”. Idghul an lu publicã protlu album cu grupa Mandinga”, cunuscut sum numa „De corazon”. Ari partitsipatã la festival internatsional ti muzicã lishoarã „Tserbul di malãmã” - Brashov, a anlu 2005 lu amintã loclu 4 la semifinala ti Eurovizii, cu cãnticlu „Soarli a mel”. Meslu ciarshar, anlu 2006 lu

scoati protlu album di aljei solo carierã sum numa „Boatsea a ta”. Dupu atsea li publicã shi albumili: „Soarli a mel”, „Lilicea a vreariljei”, „Ti voi multu”, shi alti. Ti shcurtu chiro dishclidi shi aljei sculii ti dansu, cunuscut sum numa „Pasitos”. Ari reghistratã video clipuri ti cãntitsli: „Boatsea a ta”, „Soarli a mel”, „Oclji a tãi cafilii”, „Ti voi Multu”, „Pãnã tu steali”, shi multi alti. Anlu 2009 eara reprezentantu ali Romãnii la Eurovizia di Moscva, cu cãnticlu „Featili di tu Balcan”, cãntic cari ti shcurtu chiro s-featsi mari hit nu mash tu Romãnii, ma shi ma largu. Ca cãntãtoarã cu aleaptã boatsi, Elena Gheorghe, amintã multi premii, anamisea di cari: premia Radio romãnia Actualitãts, ti nai ma bunã interpretari ti anlu 2006, premia Romanian Top Hit – Music Awards 2007 ti nai ma bun cãntic a anlu 2007, prota premii la Eurovizia dit Romãnii anlu 2009, premia „Ploacea di malãmã, trofei „Ursicã di malãmã”, trofei tu sectsiunea di folclor, ti CDlu cu muzicã armãneascã di la Ovidiu Lipan Tsãndãricã. Tu meslu martsu, anlu 2009, Costantsa, Romãnii, la cãnuscuta manifestatsii „Gala a premiilor” tu organizatsii a fondatsiiljei „Bana armãneascã” lji si duruseshti premia „Om a anlui” ti contributsia tsi u-da ti promovari shi afirmari a cãntitslor armãneshtsã, ti tsãneari tu banã a adetslor, a limbãljei shi a cãntitslor armãneshtsã. Cariera a tinirãljei cãntãtoarã Elena Gheorghe lji easti multu importantã, ma dupu zboarãli a ljei, pi prot loc, totna lji easti familia.