Vanghea Mihanj Steryiu
Vanghea Mihanj Steryiu s-amintã pi 10 di brumar, anlu 1950 tu hoara Dolean, tu Machidunii. Easti scriitoarã cu renome, cãnuscutã poetesã Armãnã, traducãtoarã, picturitsã, compozitoarã. Poezii ahurhi s-angrpseascã nica di la anlu 1963. Easti autor, cu pisti 40 di publicati cãrtsã ti mãri shi njits dghivãsitori, eseiuri, drami, piesi, romani, aforizmi shi multi alti. Easti protlu redactor shi realizator a fimiridzlor: “Armãnã Machedonã”, “Armãnj Machedunits”, shi fimirida ti ficiorits “Lãnduricã”. Vanghea Mihanj Steryiu easti fundator shi prota prezidentã a Sutsatãljei a muljerlor Armãni dit Machidunii, fundator shi prezidentã actualã a Sutsatãljei a scriitorlor shi a artishtsãlor Armãnj dit Machidunii, anlu 2000 u organizã nai ma marea manifestatsii culturalã armãneascã: “Dzãlili a culturãljei armãneascã”.
Pi cãmpul di limba shi literatura armãneascã, Vangha Mihanj Steryiu ari loatã parti la multi manifestatsii internatsionali: Americhii, Frantsii, Italii, Romãnia, Sãrbia, Vãrgãria, Albanii, Gãrtsii, Ungaria, Moldavia, Rusii, shi tu multi alti stati iu s-prezentã cu operili a ljei pi limba di dadã, limba armãneascã. Ti lucurlu pi cãmpul a literaturãljei, pãnã la anlu 2008 ari amintatã pisti 27 di premii internatsionali anamisea di cari nai ma importanti suntu: premia “Mutritlu a poetslor” ti nai ma bun esei la simpoziumlu “Poetslji, poezia shi chirolu a lor”, Galatsii, tu Romãnii, “Mihail Eminescu”, Chishinau-Moldavia, premii ti nai ma bunã carti “Oclju a suflitlui”, Trgovishte-Romãnii, laureate la Festivalu internatsional di poezii “Lucian Blaga”, Cluj Napoca-Romãnii, shi multi alti premii din lumi shi dit Machiduni. Easti membrã tu multi asotsiatsii di culturã pit lumea tutã cum shi membrã di tinjii tu Marea shi analta asotsiatsii ti culturã “Masion Naaman Culture di Liban, iu anlu 2008 u amintã analta premii ti Tinjii shi complet operi”. Ari durusitã pisti 10 000 di cãrtsã pi la sculiurli tu Machidunii, gãrdinitsili, bibliotechili, Academii din lumi, Institutsii ti fumelji, casi di edituri, oaspits Armãnj shi tu multi alti locuri. Cu a ljei lucru pi cãmpul di limba shi literatura armãneascã, scriitoara Vangha Mihanj Steryiu deadi mari contributsii ti afirmari, promovari, niintari, developari shi tsãneari tu banã a limbãljei armãneascã.