VAYILU – STÃMÃNA TSEA MAREA

Prota stãmãna ninti Pashtili easti stãmãna marea. Stãmãna ninti Pashtili, dumãnicã easti Vayilu, shi ahurheashti nai ma marea stãmãnã cãndu suntu nai ma mãrli patemati a Hristolui. Atsea dumãnicã easti cãnãscutã ca dumãnicã a fluriilor, dumãnicã a patimatlor. Tuts cari pistipsescu tu Dumidzã, atsea dzuã s-duc tu bãsearicã, shi s-toarnã cu vaie. Scljeama preftul la didea vaie, shi cãndu s-turna acasã u bãga pi ninga icoana, a di la bãsearica u loa shi ipsumã (culaclu cari ninti atsea lu dutsea tu bãsearicã) ti cari preftul cãnta liturghii shi tu cari bãga niheam yin ca crutsi cari u simboliza ancrãfãsearea a Hristolui sh-dupu atsea tu casa u ampãrtsa a tutulor membri a familiiljei. Atsea easti ti sãnãtati a tutulor, a familiiljei antreagã. Dzua di Vayilu, oaminjlji s-andridzea idghea ca ti dzua di Pashtili. S-dutsea tu bãsearicã shi a njitslor fumelji la ancupãra sandali, paputsa, fustãnj. Lunea, dupu Vayiulu, easti marsinã. Di lunea mari iara s-tsãni preasini shi s-mãcã linti, fisulj, cushafi. Tu stamãna tsa marea, martsã shi gioia poati s-mãcã untulemnu. Vinirea mari, ninti Pashtili, easti nai ma mari sãrbãtoari. Dupu tsi treatsi chirolu a Preasinjlor, tu stãmãna mari, multsã ãmbistimenj Armãnj s-dutsea la bãsearica, sh-li spunea mãrtiili shi s-cumnica. Armãnjlji ãmbistimenj cu multu pisti li tsãn tuti Preasini, shi cu tinjii cãtrã Dumidzã s-aproachã di Hristolu. Pistea shi bãsearica avea multu importantã roljã tu bana a Armãnjlor shi tu tsãnearea a Armãnjlor ca popul.