Toma Eanache

Toma Eanache easti cãnãscut rejiser armãnescu, faptu anlu 1970, Bucureshti, Romãnia. Ari dipisitã Facultati di rejii-teatru, a studii postuniverzitari dipisi la anlu 2006 la Academia di teatru shi film, Bucureshti. Easti rejiser pi ma multi piesi, tradusi pi armãneashti, tu cari multi ori u gioacã shi rolja printsipalã. Anlu 2005 mari suctses avu cu piesa “Unã noapti furtunoasã” di I.L.Caragiale tu cari agiucarã acteri di Teatrul Natsional di Bucureshti. Easti zbor ti piesã cari eara prezentatã ma multu di 95 di ori Romãnia shi tu xeani (R.Machidunia, Ungaria, Espanja, Ghermanii). Rejiser easti shi a piesilor: “Sodoma shi Gomora”, “Mincinoslu” di Carlo Goldoni, ”Secta a muljerlor” dupu “Niorlji” di Aristofan shi multi alti piesi cari alãsarã mãri impresii la publicã. Ti lucurlu a lui ca rejiser, ari amintatã ma multi premii, anamisea di cari easti shi premia “GRAND PRIX MARULIC” – anlu 2007. Rejiserlu Toma Eanache easti shi cãnãscut acter armãnescu, jurnalistu-redactor la RADIO ROMÃNIA INTERNATSIONAL – Bucureshti, traducator, shi cu lucurlu a lui da mari contributsii ti nintari a limbãljei armãneascã.