PROT SIMPOZIUM TI STANDARDIZARI A LIMBÃLJEI ARMÃNEASCÃ

Pi initsiativã a Editurãljei Cartea Aromãnã, di 24 pãnã 31 di augustu, anlu 1997, Bituli, tu Republica Machidunia, s-tsãnu Simpozium ti standardizari a limbãljei armãneascã. Delegats, pitricuts di sutsãtsli natsionali, di tsintsi stati balcanitsi: R.Machidunii, R.Vãrgãrii, R.Albanii, Sãbii shi Rumanii, cum shi di Statili Uniti ali America, s-adunarã shi shapti dzãli cu aradã zburãrã ti regulili shi ti standardizarea a limbãljei armãneascã.

Limba armãneascã easti unã di ma vecljili limbi cari sã-zburashti pit aesti locuri.Tu statlu a nostru ca examen facultativ, tu sculili primari, s-ãnveatsã di la anlu 1995, a ca examen optsional di la anlu 2008. Regulili cari s-ufilisescu ti ãngrãpseari shi ti dghivãseari suntu atseali cari eara aprucheati la Simpozium ti standardizari a limbãljei armãneascã, cari s-tsãnu Bituli, la anlu 1997. La aestu Simpozium s-discuta ti regulili ti ãngrãpseari shi pronuntsari, cu scupo s-ãndreagã Ãndriptar Ortografic, Ortoepic shi di Punctuatsii. Avea multi discusii, multi propuniri shi tu soni eara aprucheati regulili cari azã s-ufilisescu la ãnvitsarea a limbãljei armãneascã tu sculiili primari. Cu umuti cã unã dzuã va s-agiungã pãnã la un sistem unitar ti ãngrãpseari pi limba armãneascã, partitsipantsãlji di tuti stati li apruchearã regulili cu consensus shi azã scularlji dit Machidunia cari s-duc la ciasuri pi limba armãneascã, li ufilisescu aesti reguli.