PORTUL ARMÃNESCU DIT MACHIDUNIA DI DAT

PORTUL ARMÃNESCU DIT MACHIDUNIA DI DAT

Portul armãnescu easti un di elementili caracteristitsi dupu cari Armãnjlji s-aleg di alanti etnii. Easti caracteristic dupu avutlu colorit, cu multi detali shi easti unic tu Balcanlu shi ma largu. Portul muljurescu easti chindisit cu mushati mãrdzeali, cu ornamenticã gheometricã, tu colori diferenti. Cãmeashea easti lungã pãnã di dzãnuclji, cu lundzã mãnits. Fustanea easti adratã di penush, di ninti s-anclidi cu nasturi, andzeanã easti strimtã, a di mesi ãnghios easti multu largã. Lungã easti pãnã di sum dzãnuclji. Portul easti chindisit cu sãrmã tu colori diferenti, cu multi gãitãnj. Ari shi ilechi shi poalã adratã di pinush, ma tu unã colori, chindisitã cu sãrmã shi mãrdzeali tu ma multi colori. Pisti poala s-bagã bãrnul, chindisit cu mãrdzeali di tuti turli, cu cari muljerli Armãni adra multi formi gheometritsi. Pãrpodzli suntu adrati di lãnã, suntu pãnã di dzãnuclji, shi ãndzeanã ari ciori ti lidzeari. Pi cap muljerli Armãni purta cãciulã, tu formã di conus. Distimelea easti chindisitã cu mãrdzeali shi s-purta pisti cãciula. Cãciulili a ãnveastilor eara ma chindisiti, avea aplicatsii tu formã di amuri, cu shasi lilici tu colori diferiti, adrati di mãri mãrdzeali. Portul bãrbatescu easti ma simplu, ma di altã parti, atsel tsi u poartã, alasã impresii di nicuchir la loc. Adrat easti di fanelã di bãmbac, cãmeashi, ilechi cari easti chindisitã cu mushati gãitãnj. Pantalonili suntu adrati di lãnã, pi mesi s-leagã cu ciori, di nãnãparti ari gãitãnj, a dighios pãndzãturi s-ãncljid cu nasturi. Pãrpodzli suntu pãnã di dzãnuclji, ampiltiti di lãnã. Portul bãrbãtescu ari cãciulã shi capotã ti yarna. Portul armãnescu easti parti di avearea culturalã a Armãnjlor shi semnu ti egzistari a Armãnjlor pit etsli, pi aesti locuri di Balcanlu tut.