NALI COMPONATI CÃNTITS PI LIMBA ARMÃNEASCÃ

Limba, cultura, istoria, traditsia, adetsli, folclorlu, suntu elementi dupu cari Armãnjlji s-aleg di alanti etnii. Cãnticlu armãnescu, vecljul iho armãnescu easti elementu spetsific cari lji caracterizeadzã Armãnjlji ca popul ahorghea. Ma di la anlu 1996 s-dishclisi nauã frãndzã tu ma naua istorii a Armãnjlor. Pi initsiativã a Ligãljei a Armãnjlor dit Machidunii, tu meslu mai, anlu 1996 s-tsãnu protlu festival armãnescu cu nali componati cãntits sum numa «Fãntãnã». Aestu festival eara posibilitati s-promoveadzã nali cãntits armãneshtsã, ma shi nãi cãntãtori Armãnj, cari cu mari harau shi mirachi cãnta cãntits ti vrearea, ti armãnamea, cãntits ti tricutlu a Armãnjlor. Dupu doi anj, anlu 1998, s-organizã nica unã editsii di festivalu «Fãntãnã» iu s-promovarã nali cãntits armãneshtsã. Armãnjlji cu harau lu ashtipta aestu festival.

La anlu 2001 shi 2002 s-organizarã diznãu festivali ti nali componati cãntits armãneshtsã, ma aestã aradã sum altã numã «Fãntãnã di malãmã». Tu migdani inshirã nali cãntits cu temi diferenti, cãntits cari alãsarã mari semnu nu mash la Armãnjlji dit Machidunii, ma shi la Armãnjlji di iutsido.

Dupu doi anj, ma egzact anlu 2004, festivalu «Fãntãnã di malãmã» adusi tsiva nau pi stsena di muzica armãneascã. Pi ninga folc cãntits armãneshtsã ti prota oarã eara promovati shi pop cãntits armãneshtsã la cari loarã parti nu mash cãntãtori Armãnj, ma shi cãntãtori di stsena machiduneascã. Ti mari harau a tinirlor Armãnj, nali pop cãntits armãneshtsã s-avdzãrã shi la festivalu «Fãntãnã di malãmã» anlu 2006 cu tsi fonoteca cu cãntits armãneshtsã ã s-featsi nica ma avutã.

Intereslu ti festivalu armãnescu sh-azã tutã dzuã easti mari, ca atsea eara fãntãnã di iushirã multi nali cãntits shi multi nali numi cãntãtori Armãnj.