Manifestul di Crushuva
Manifestul di Crushuva
Frats cobãnãtori shi duruts vitsinj! Noi, a voshtsã vitsinj di totna, oaspits shi cãnãscuts di mushata Crushuva shi di primushatili hori, fãrã diferentsã di pisti, natsionalitati, sexu shi mindueari, cã nu puteam s-u strãxim tirania a apreshlor di seati ti sãndzã shi agiunjlji ti carni di om, cari mutrescu shi noi shi voi s-nã bagã pi cãtsut, shi noi shi voi, s-nã bagã pi ciumagã s-cãftãm njilã, shi a noastrã vrutã shi avutã Machidunii s-undzeascã pi pustelii pustuxitã, azã mutãm cap shi adusim apofasi, cu tufechi s-na apurãm di atselji a noshtsã shi a voshtsã dushmanj, shi s-u amintãm libertatea. Voi multu ghini shtits ca noi nu him nibunj oaminj, shi achicãsits cã di zori lu bãgãm caplu tu trastu, s-bãnãm ca frats tu aestu stat, noi va avem ca anoshtsã shi vrem s-armãnem a noshtsã ti totna. Noi nu mutãm tufechi contra voi – atsea va s-hibã arshini ti noi; noi nu mutãm tufechi contra populu ãnturtsescu lãcrãtor shi tinjisit, cari s-hãrneashti ca noi, cu asãdoari sãndzinatã – el easti frati a nostru, cu el avem bãnatã shi eara vrem s-bãnãm; noi nu inshim s-vãtãmãm shi s-arichim, s-aprindem shi s-furãm – duri na suntu zulunjli a derebeilor pitu oarfãna shi sãndzinata Machidunia a noastrã; noi nu inshim s-lji adrãm Crishtinj shi s-la lom tinjia a dadilor shi a surãrlor a voastri, muljerli shi hiili a voastri; lipseashti s-shtits ca avearea a voastrã, bana a voastrã, pistea a voastrã shi tinjia a voastrã nã suntu ahãt scumpi, cãt nã suntu scumpi shi a nostri. Mash ta s-u avigljem avearea, bana, pistea shi tinjia, noi lom tufechi. Noi nu him murtats pi loclu a nostru, iu him faptsã, noi nu him furi, ma revolutsioneri cu giuratic s-murim ti andriptatea shi ti libertatea; noi nã alumtãm contra tirania shi contra sclavilja: noi nã alumtãm shi va nã alumtãm contra murtatslji, contra furlji, contra zulumchearlji, contra atselji cari vor s-u ljea tinjia shi pistea a noastrã, shi contra atselji cari u sug asãdoarea a noastrã shi lu exploateadzã lucurlu a nostru. Di noi, shi di horli a noastri s-nu va aspãreats – a curiva znjii nu va lji adrãm. Noi, nu mash tsi va avem ca frats a noshtsã, ma shi vã jãlim ca frats a noashtsã, noi achicãsim cã shi voi hits sclavi idghea ca noi, sclavi a vãsiljelu, efendadz shi pãshadz, sclavi a avutslor shi a sãnãtoshlor, sclavi la zulumchearlji , cari di paturli pãrtsã u apreasirã vãsilia, shi tsi nã bãgarã noi s-mutãm caplu ti andriptatea, libertatea shi ti banã tinjisitã. Ti andriptati, libertati shi ti banã tinjisitã, vã calisim shi voi, s-yinits, deadun s-na alumtãm! Yinits, frats Muslimanj, cu noi, s-anchisim contra dushmanjlji a noshtsã shi a voshtsã. Yinits sum hlambura ali “Machidunia Autonomã”! Machidunia easti dadã a tutulor shi greashti ti agiutor! Yinits s-li frãndzem shingirili di sclaviljea, s-ascãpãm di pidimadzlji shi di zorea, shi s-li uscãm arãurli di sãndzã shi di lãcãrnji! Yinits frats la noi, s-li adunãm deadun suflitili shi inimili, shi s-ascãpãm, noi, fumealjea shi parafumealjea a noastrã s-bãneadzã tu irinji, s-lucreadzã tu isihii shi s-ducã ninti!... Duruts vitsinj a noshtsã! Ca Turtsã, Arnauts shi Muslimanj, noi achicãsim cã voi minduits cã vãsilia easti a voastrã shi cã voi nu hits sclavi, cã pi hlambura a vasiliiljei nu ari crutsi, ma ari steauã shi lunã. Ca nu easti ashitsi shi ca alutusits, voi agonjea va vã dushits shi va s-achicãsits. Cara s-vã hibã namuzi s-yinits cu noi, shi s-aspunets cã hits contra tirania a vãsiliiljei, noi, a voshtsã frats dupu loclu di bãnari shi dupu pidimadz, nu ari s-vã cãrtim shi nu ari s-him contra voi. Noi singuri va nã alumtãm shi ti noi shi ti voi, cara s-lipseascã, pãnã di un va s-murim sum hlambura ti libertatea a noastrã shi a voastrã, shi ti andreptul a nostru shi a vostru. “Libertati icã moarti” easti ãngrãpsitã pi frãmtili a nostru, shi pi hlambura a noastrã sãndzinatã. Noi u mutãm atsea hlamburã shi nu ari turnari. Cara s-na avets shi voi ca frats a voshtsã shi nã vrets buneatsã, cara s-minduits eara s-bãnats cu noi, ashi cum bãnats shi pãnã tora, shi cara s-hits hilji cu pisti shi dignitati ali dada Machidunia, putets s-nã agiutats mash cu unã – a atsea easti mari agiutor: s-nu nirdzets cu dushmanjlji. S-nu yinits cu tufechi contra noi shi s-nu adrats zulunj pit horli crishtineshtsã. Dumidzã s-u vluyiseascã alumtarea ayisitã ti andriptati shi ti libertati! S-bãneadzã alumtatorlji ti libertatea shi tuts tinjisits shi bunj hilj machiduneshtsã! Ura! “Ti Machidunia Autonomã”!