DZUA NATSIONALÃ A ARMÃNJLOR 23 DI MAI - SÃRBÃTOARI DI STAT TU REPUBLICA MACHIDUNIA

Republica Machidunia eara protlu stat tu lumea tutã, cari cu Constitutsia a ljei di 17 di brumar anlu 1991, lji pricãnãscu Armãnjli ca popul ahorghea, ca popul constitutiv a statlui machedonescu. Dupu ea shi Arbinishia ãlji pricãnãscu Armãnjli ca popul ahorghea.

Atsea dupu tsi Machidunia s-aleadzi di alanti stati cãndu easti zbor ti ãndrepturli a Armãnjlor, easti shi factul cã R.M easti uniclu stat tu lumea tutã, tu cari Dzua Natsionalã a Armãnjlor 23 di mai, s-ãnseamnã ca sãrbãtoari di stat. Atsea s-featsi ca rezultat a alumtariljei a Partiiljei a Armãnjlor dit Machidunii ashi ca pi 8 di shcurtu anlu 2007, multsimea di deputatslji tu Parlamentul machedonescu votarã, Dzua Natsionalã a Armãnjlor - 23 di mai, s-hibã sãrbãtoari di stat, dzuã cãndu institutsiili di stat (Prezidentul, Guvernul, Parlamentul) shi ofitsial va s-pitreacã urãri pãnã la populatsia armãneascã, a Armãnjlji va s-aibã andreptu atsea dzuã s-nu s-ducã la lucru.

Mite Costov Papuli-prezidentu la PAM Parlamentul ali RM Ljubisha Ghiorghievschi-prezidentu a Parlamentului ali RM

Aestã idei shi cãftari easti veaclji, ma di cãndu Partia a Armãnjlor dit Machidunii ãn cap cu prezidentul Mite Costov Papuli vinirã pi potesi, s-deadi cãftari ofitsialã (amandman 21) cari tu Parlamentul lu prezentã deputata Anita Chiparizovsca cari easti cu originã armãneascã shi tu atsel chiro eara reprezentantu a Armãnjlor tu Comisia ti relatsiili anamisea di comunitãtsli etnitsi tu Parlamentul machidunescu. Cãftarea eara, tu Nomlu ti sãrbãtori ali Republica Machidunii Dzua Natsionalã a Armãnjlor-23 di mai, s-hibã scriatã ca dzuã di sãrbãtoari ofitsialã. Prezidentul a Parlamentului tu atsel chiro, Ljubisha Ghorghievschi, cari easti cu originã armãneascã, la ãndamãsea cu delegatsia a Partiiljei a Armãnjlor dit Machidunii dzãsi cã va-s agiutã aestã dzuã s-hibã sãrbãtoari di stat di ispeti cã dupu a lui mindueari – “ Armãnjlji suntu “sari” pi Balcan – niheam lji ari, ma fãrã di elji nu s-poati”.

Dupu votarea a deputatslor tu Parlamentul, pi 8 di shcurtu, s-alãxi articulu 2 di Nomlu ti sãrbãtori ali RM (fimiridã ofitsialã ali RM nr.21/98), ashitsi ca tu alinea 13 scrii: Tu Republica Machidunia s-sãrbãturiseashti shi nu s-dutsi la lucru pi 23 di mai, Dzua Natsionalã a tutulor cari pricad a comunitatiljei armãneascã.

Dupu tuti discusii, a tu sinfunilji cu articulu 75 di Constitutsia ali Republica Machidunia, Prezidentul ali RM shi Prezidentul a Parlamentului ali RM deadirã DECRET ti proclamari a Nomlui ti alãxeari a Nomlui ti sãrbãtori ali RM.