Casa a familiiljei Prenda
Casa a familiiljei Prenda unã di cama cãnãscutili shi tinjisiti familii armãneshtsã di Crushuva, easti shi familia Prenda, vinits di Moscopolea, cãndu fudzea di funicolu adrat di parti al Ali Pasha Tepelin. Nai ma marli di fratslji Leascu Prenda, eara favru, cari multi ori s-dutsea Istanbul di iu purta shi material tsi lji lipsea ti lucurlu a lui. El avea patru frats shi tuts lucre cu comertsii. Nica tu atsel chiro, Bituli avea dishclisã multi duchãnj, tu cari vindea hãlãts, machinj shi alti. Tu dipisita a etãljei 19, icã ma exact la anlu 1862 avutlu Armãn Leascu Prenda Crushuva adrã casã di sãnãtos material cu cheatrã, cari s-afla aproapea di bãsearica Alju Yian, anamisa di dau njits sucãch. Azã nicuchir alishtei casã easti Armãnlu Tachushta Prenda, nipot al Leascu Prenda. Casa easti mari shi ari etaj dinpadi shi nica doi atajuri cari suntu adrati cu simetrii. Avuta vidzutã a casãljei di nafoarã, constructsia stabilã, harmonia a fasadãljei, cum shi enterierlu exluziv u adarã aestã casã s-hibã unicã tu cãsãbãlu Crushuva. Mushata vidzutã a fasadãljei adratã cu colori u ardãpseashti casa a familiiljei Predna anamisa di nai ma bunili obiecti cu ahtari arhitecturã, dzãc di Casa ti avigljeari a monumentilor di culturã. Trei stiznji di nafoarã pitu tutã analtsimi a casãljei suntu adrati di frãmtã cheatrã, a stiznjili di nuntru shi stizma di nafoarã pi fasada di ninti suntu adrati di bondruc. Etajlu doi pi fasada di ninti easti ma largu shi easti bãgat pi conzoli di cimentu, a ushili shi firidzli pi balconea dipisescu cu lacuri. Tuti etajuri au ciardachi cari leagã cãti patru udadz pi cafi un nivel. Anclisa ciardachi sh-aoatsi cum shit u tuti alanti casi di Crushuva, dipiseashti cu balcony, ashi dzãsã loghii. Pisti ushea pi balconea putum s-videm un multu mushat vitraj cu colori diferenti ampiltit ca Soari cu optu zari. Ligatura anamisa di etajurli easti adratã cu scãri di leamni cari s-aflã tu mesi di casa, contra usha printsipalã a casãljei. Atsea tsi easti caracteristicã ti aestã casã easti atsea tsi ciãtia easti adratã di ploci cu trei chioshcuri. Tora ti tora, aestã casã easti unicã cu ahtari ciãtii, tsãnutã tu a ljei constructsii avtenticã, ashi ca cum iara adratã. Casa ari shi avutã nicuchiratã. Andreaptã easti cu elementi tsi suntu caracteristichi ti tuti casi di Crushuva, cum suntu: musãndzrã, ti cari nicuchirlu a casãljei Tachishta Prenda dzãtsi ca suntu di mari agiutor, dupu atsea ari dulãchi, mindar shi alti. Intrata a casãljei nica easti anvãlitã cu ploci di chetsãri. Tu doi udadz ari shi vatrã, adrati nica tu chirolu cãndu s-adra casa. Tãvãnjli suntu adrati cu scãnduri, a tu udzãdzli ti oaspits, tãvãnjlji suntu adrati cu mushatã rezbã shi dezen, shi atsea tu tsentrul a tãvaniljei. Nicuchirlu a casãljei dzãtsi ca deadi multsã pãradz pãnã tora ti a ljei priadrari, a suntu lipsiti nica multu finansii ta s-poatã s-hibã renovate di dip.