Casa a familiiljei Hagilega
Casa a familiiljei Hagilega familia Hagilega easti unã di cama veaclili familii armãneshtsã cu originã di Crushuva. Tu aestu cãsãbã, familia Hagilega easti vinitã di tu Gãrtsii, di Gramoste, ninti vãrã 300 di anj. Tora unã parti di familia Hagilega bãneadzã Crushuva, a unã parti di familia vinirã s-bãneadzã Scopia. Casa a familiiljei easti adratã ninti vãrã 150 di anj, shi easti tsãnutã avtentic, ashi cum eara adratã nica tu ahurhita. Casa easti cu veaclji arhitecturã, tsi easti caracteristicã ti casili di cãsãbãlu Crushuva. Easti zbor ti veaclji arhitecturã din cãsãbã, casã cari lu mushuteadzã cãsãbãlu Crushuva. Ari dau etajuri, pi cafi etaj ari cãti trei udadz, ciardachi, cu multiu firidz, ma exact cu 24 firidz. Cu Nomlu ti avigljeari a monumentilor di culturã, aestã casã easti avigljeatã, ma mash pi carti, tsi va s-dzãcã ca statlu nu adunã gãile ti tsãneari a vidzutãljei avtenticã a casãljei, ma nicuchirlji a casiljei singuri investarã pãradz ta-su tsãnã malju dzã ca nau casã. Casa easti dau ori renovatã, ashi ca fasada easti nau. Nicuchirlji a casãljei dzãc ca cu pãradzlji tsi li investarã tu renovarea, pãnã tora putea s-adarã dau nali casi. Ma, di ispeti ca aestã casã ãnseamnã tsiva ma multu di cãt obiectu ti bãnari, scljeama di ispeti ca easti unã mari istorii ti familia Hagilega shi ti cãsãbãlu Crushuva, Hagilega singuri u renovarã casa.
Nicuchirlji di tora dzãc ca aestã casã easti ancupãratã la anlu 1914, di la Armãnj, cãndu ãn Sãrunã suntu adrati shi tapiili ti a ljei adrari di la anlu 1885. Tu chirolu cãndu nãilji nicuchiri u priadrarã aestã casã, pi unã grendã lu aflarã scriat anlu 1845 tsi zburashti ca aestã casã poati s-hibã shi multu cama veaclji. Tu cafi udã tu casa aestã ari musãndzrã, chindisiti cu ahãndoasã rezbã. Pi a doilu etaj, tu unlu udã, s-aflã portreti di strãpãpãnj ardãpsiti tu bairu, a tu idghiul udã s-veadi ca fantasia a masturlor eara dealihea mari ca adrarã unã multu mushatã davani cu dezen shi rezbã, unicã tu cãsãbãlu Crushuva. Tu un udã, pi stizma s-aflã shi Steaua al David, a ãn ligãturã cu atsea, un di nicuchirlji a casãljei dzãtsi ca ari dau apandãsi: una apandãsi easti ca vãrã di masturlji cari u adra casa eara mason, a alantã apandasi cari easti shi cama ti pistipseari easti ca vãrã di nicuchirlji di ma ninti eara membru tu loja a masonjlor.
Uborlu tut easti ãnvãlit cu ploci di chetsãri tsi easti caracteristicã ti cafi un ubor di Crushuva. Ma ninti, tselarlu eara ãnvãlit cu ploci di chetsãri, a tora easti renovat shi adrat cu cimentu.