CONSILIULU A ARMÃNJLOR

CONSILIULU A ARMÃNJLOR

Consiliulu a Armãnjlor easti fundat pi 26 di ximedru anlu 2005, a ofitsial easti reghistrat pi 17 di alunar anlu 2008 Tirana, tu R.Albania. Ma, titsi eara lipsitã s-fundeadzã un ahtari organ, cari easti scupolu a Consiliulu a Armãnjlor! Di cãndu Armãnjlji ahurhirã s-alumtã ti andrepturli alor pi nivel European, Europa caftã noi Armãnjlji s-avem unã organizatsii tu cari va s-intrã tuti sutsãts armãneshtsã. Tuti comunitãts etnitsi cari s-aflã tu idghea situatsii ca Armãnjlji, au un ahtari Consiliu. Consiliulu a Armãnjlor lipseashti s-hibã unã boatsi a tutulor Armãnj. Delihea easti, ca, tora di oarã tuti sutsãts armãneshtsã nu suntu intrati tu Consiliulu a Armãnjlor, ama condutsirea pistipseashti ca va s-yinã shi atsel chiro.

Scamnul a Consiliului easti Moscopolea, republica Albania - simbolu a Armãnjlor - populu cari pãnã azã sh-tsãnu adetsli armãneshtsã.

Membri fundãtori a Consiliului suntu 5 sutsãts armãneshtsã: Comunitatea a Armãnjlor dit Rumunii, Tsentrul ti limba shi cultura armãneascã dit Vãrghãrii, Liga a Armãnjlor dit Machedonii, Sutsata "Mandra" dit Albanii shi Sutsata a Armãnjlor dit Frantsii. Scupazlji a consiliului a Armãnjlor suntu scriati tu statutlu. Protlu shi naima importantul Scupo a Consiliului easti pricunushteari a Armãnjlor ca popul ahorghea, tu cafi un stat pi Balcan, iu bãneadzã Armãnj, iu nica nu suntu pricãnãscuts. Consiliulu va s- da sustsãniri a Comunitãtslor armãneshtsã ta s-lu amintã ststuslu di minoritati natsionalã icã di popul constitutiv, ashi cum easti prividzutã cu regulili a cafi unui stat. Consiliulu a Armãnjlor va s-alumtã s-lu amintã statuslu di organizatsii niguvernalã ãn-cadur a Consiliului ali Europa. Lipseashti s-lu coordineadzã lucurlu anamisa di sutsãtsli, shi tu soni, Consiliulu lipseashti s-ljea ligãturã cu Guvernurli iu bãneadzã Armãnjlji shi s-colaboreadzã cu institutsiili alushtor Guvernuri, ti amintari a ãndrepturlor fundamentali.