Casa a familiiljei Telescu
Casa a familiiljei Telescu tu tsentrul a cãsãbãlui Crushuva, aproapea di Monopolu s-mutã unã multu mushatã casã adratã nica tu ahurhita a etvljei 19 icã la anlu 1815 a curi nicuchirã easti d-na Anastasia Telescu. Nu poati om s-priimnãpit Cãsãbãlu Crushuva, a s-nu u veadã aestã mushatã casã cari anghiliceashti cu a ljei vidzutã di nafoarã.
Dupu antribarea ali Moscopole di parti al Ali Pasha Tepelin, avuta shi largu cãnãscuta familii Gogu vini s-bãneadzã Crushuva. Hilj-lu Chiriu Gogu, lalã a nicuchirãljei di tora s-dusi Parijlji iu cu suxes dipisi arhitecturã shi dupu atsea ahurhi s-lucreadzã. Parijlji s-ansurã cu unã Greacã, cu cari avu dau hilji, cari tsiva ma amãnat fudzirã s-bãneadzã, unã ãn Sãrunã, a alantã Atina. Di Parijlji, Chiriu Gogu, ca multu livendu lãcrãtor, eara pitricut ca membru tu misia ti adrari a Canalui di Suets, tu faza dit soni. Firma frantsuzeasca cari lu finansa aestu proectu lu bãgã s-lucreadzã cu finansii.Pistusinea tu Chiriu Gogu eara ahãntu mari, ashi ca pãradzlji nu i li misura, ma i li yixea cu ziga, dz pãradzlji nu i li misura, ma i li yixeatsi nipoata a lui Anastasia Telescu. Dupu dipisearea a misiiljei, Chiriu Gogu s-turnã Crushuva. El avea amintatã multsã pãradz shi ti mari vreari cãtrã dada-sa shi dauli surãri, Crushuva adrã casã. Di masturli cãfta s-lucreadzã ashi cum va lã dzãcã el, shi lã dzãtsea: mini va vã pãltescu cãt lipseashti, a voi va s-lucrats mini cum va vã dzãc. Tsiva cara s-nu nji ljea hari, voi atsea va u aspãrdzets shi ear ava u adrats, a ti tinjia nu antribats. Cum eara bun arhitectu, casa tutã u adrã cu mari vreari, cu stil dupu a lui gustu. Materialu di cari easti adratã casa easti sãnãtoasã cheatrã cu analtu calitet. Aestã casã easti adratã ti bãnari, sh-ari etaj di ãnpadi shi nica dau etajuri, cari suntu tu simetrii un cu alantu. Etajlu di ãnpadi ari mari trem shi doi udadz, tselari. Protlu etaj ari mari ciardachi cari leagã patru udadz cari nu suntu cu unã mãrilji. Etajlu di ãnpadi cu alanti dau etajuri easti ligat cu scãri di lemnu. Stiznjili di etajlu di ãnpadi suntu adrati di cheatrã, dauli etajuri cu bondruc, a mash pi fatsa a casãljei, dauli stiznji di dinãpoi, pi tuta analtsimi a casãljei suntu adrati di cheatrã. Tu ma njitsli udadz ari dulãchi, a tu atseali ti oaspits ari musãndzrã. Timpanonlu pisti balconea easti chindisit cu ornamenti di flora shi fauna. D-na Anastasia Telescu dzãtsi ca ninti multu chiro, Crushuva yinea Armãnj dit Gãrtsii shi s-interesa ti istoria a lishtei casã. Aestã casã easti anamisa di protili, avigljeatã cu Nomlu ti avigljeari a monumentilor ti cultura tu Republica Machidunia. Pãnã tora, casa easti renovate mash unã oarã, ca pãradzlji tsi li deadi statlu eara duri mash ti a ljei ampiticari, dzãsi d-na Telescu. Antribarea easti desi chirolu va sh-lu adarã a lui lucru shi aestã casã peanarga va s-aspargã icã atselji cari suntu competentsã va s-ljea vãrã metri, aestã casã shi alanti ca ea s-hibã renovati shi avigljeati tsi poati ma agonjea.