Casa a familiiljei Iconomovi
Casa a familiiljei Iconomovi, nica tu ahurhita a etãljei 20 tu cãsãbãlu Scopia ahurhirã s-creascã nali obiecti cu nali caracteristichi. Anamisa di eali easti shi casa a familiiljei Iconomovi, obiectu cu caracteristichi dit atsel chiro. Intereslu ti locatsia a obiectului familiar ti bãnari s-veadi nica la anlu 1919. Dupu tapiili, nicuchir a loclui eara Petar Iachimovich, ma di la anlu 1920, Dimtar Iconomov easti nicuchir a ahurhitlui obiectu tu constructsii cari azã ari trei etajuri, etaj di ãmapdi,udadz sum ciãtia shi izbã.
Familia Iconomovi easti vinitã di Cucush. Eara parmateftsã shi ca multu avutã familii, eara nicuchirã a duchaniljei ti untulemnu, avea drãshtealã, moarã, eara nicuchiri shi a hoarãljei aproapea di Cucush, Garbashel, a Cucush, nai ma marea casã eara a lor, cãnãscutã ca Iconomov conac. Dimitar Iconomov eara un di shaprilji frats, cari dupu dipisearea a Gimnaziiljei ãn Sãrunã, eara pitricut ca dascal tu Novo Selo di Shtip. Eara cãnãscut revolutsioner cari s-alumta contra Turtsãlji, titsi lipsea s-ducã 101 di an ahapsi. Ma pi initsiativã a puterlor di Ascapitat, dupu tricutili trei anj shi giumitati, eara silighit. Di aclo s-dusi Jeneva, iu s-ãngrãpsi pi Facultatea ti meditsinã. Ma emigrantsãlj polititsi dit Machidunii lji dzãsirã ca ma ghini easti s-ducã la Facultatea ti dentishtsã. Ashi, Dimitar Iconomov fu protlu dentistu tu Machidunii. S-ãnsurã cu Tsveta di Scopia, a curi pãrintsã eara avuts shi cu doarãli tsi i li deadi fen-su, puturã s-u adarã giumitati di casã a familiiljei Iconomovi.
Obiectul easti adrat dupu proectul a arhitectului Dudov, a easti bitisit la anlu 1922. Casa ari elementi di iughen stil. Fasada easti chindisitã cu elementi decorativi, cu ornamenti di veghetatsii. Dezenlu di her s-veadi pi detalili di usha tu intrata, pi gardul di conzoli pi etajlu doi shi trei pi aradã, cum shi pi gardul di scãri. Aestã casã nica di prota avea instalatsii ti apã cu rezervoar pi dãvani, a tsiva ma amãnat eara asãpat aputs cari s-ufilisea cu hidrofor. Stolizma easti adratã di lemnu di nuc, chindisitã cu furnir shi ornamenti. Unã parti di atseali elementi suntu ancupãrati di conzullu dit Belghii di atsel chiro, adrati Viena.
Tu aestã casã, dupu A doilu polim mundial, vãsilia bãgã s-bãneadzã alti familii, ma apartmanurli nu eara natsionalizati. Familia Iconomovi, Scopia avea nica unã casã pi trei etajuri shi ducheani pi dau etajuri, ma cu planlu urbanistic eara surpati. Tu chirolu di trimburarea a loclui, obiectul a familiiljei Iconomovi avea znjii, shi diunã oarã eara faptã sanatsii di parti a nicuchirlui Ratco Iconomov. La anlu 1965 tu tsentrul a cãsãbãlui, a ma multilor obiecti lã eara renovatã fasada. A tutulor, cum shi a casãljei al Iconomovi pi fasada eara alichiti ploci cheramicã, a ornamentili eara surpati. Azã aestu obiectu easti renovat shi casa u tsãnu a ljei vidzutã avtenticã di ma ninti, cu tuti detali pi fasada.