Casa a familiiljei Gevargi

Casa a familiiljei Gevargi mushatili casi armãneshtsã s-aflã pit Bitulea tutã. Ashitsi, tu dipisitã a secului 19, pi sucachea Beogradsca, numirlu 21, easti construatã casa a familiiljei Gevargi. Ca cum dzãtsi cãnãscutlu arhitectu di Bituli, d-ul Vladimir Hagiyovanovschi, aestã casã dealihea easti raritet tu aestã parti a cãsãbãlui. Casa nu puteam s-u videm nuntri, ca tu ea azã nu bãneadzã cana shi eara ãncljisã. Casa arid au etajuri cu ahãndos asãpatã izbã shi apusi udãdz pi tãvanea. Partea di ãndzeanã easti ma largã, bãgatã pi conzoli di her, a casa tutã easti adratã cu mushati ornamenti. Firidili di protlu etaj au gardu di her, ti ma bunã siguritati shi ma bunã avigljeari, a pi etajlu dau firidili au cãpãchi adrati di lemnu. Aestã casã easti anamisa di protili Bituli, nã dzãsi arhitectul Hagiyovanovschi, pi cari suntu bãgati chunghi shi  atsea mash pãnã di protlu etaj, adrati nica tu atsel chiro, cãndu eara construatã shi casa. Di ninti a casãljei, pisti ushea, tu intrata, easti adratã njicã bãlconi, intratã tu harmonii cu casa, tsi easti caracteristica ti casili di Bituli, di tu atsel chiro. Fasada a casiljei easti ghini avigljeatã, mash tsi avu niheam znjii tu chirolu di trimburarea a loclui, di 1 di yizmãciunj, anlu 1994, ashi ca cu niheam finansii, poati s-facã a ljei sanatsii, cu tsi casa va s-poatã s-hibã avigljeatã tu a ljei constructsii avtenticã, ashi ca cum eara atumtsea cãndu eara construatã.