Casa a familiiljei Caragia

Casa a familiiljei Caragia, tu tsentrul a cãsãbãlui Scopia, aproapea di veacljea stashoni ti pampori s-mutã unã multu mushatã casã cu imigi european. Hotelu Bristol shi pi ninga atsea tsi ma multi ori eara renovat iara lu tsãnu proectul original di cãnãscutlu arhitectu Ivan Artimushchi. Pi 17 di yizmãciunj, anlu 1924, fratslji Atanas, Tashco shi Risto Caragia lu disfeatsirã nai ma luxuzlu hotel tu cãsãbãlu Scopia. Deadun cu a lor casã pi dau etajuri, avutslji parmateftsã, nicuchiri a hotelui Bristol lu didea sum ayoghi. A lor firmã cãnãscutã ca “Fratslji Caragia”, deadun cu tuta aveari mobile shi nimobilã, la anlu 1947 eara natsionalizatã. A cafi an, mash ti a lor yiurtii familiarã Alju Nicola, pi 19 di andreu, hotelu Bristol eara rezervat ti mãrlji shi tinjisits partneri shi burjui cu cari lucra fratslji Caragia.

Dupu informatsia di la Institutsia ti avigljeari a monumentilor di culturã, di aspectu architectonic, aestu obiectu easti combinatsii di stiluri europeani adrat dupu gustul a burjuaziiljei di Scopia, di atsel chiro. Dzatsi anj ninti A doilu polim mundial, Bristol, deadun cu marea salã, paturli etajuri cu 100 di udadz shi bãhcelu di veara, eara dominantu dupu a lui mushuteatsã contra Ruschi Cral, Moscva, Dungherschi, Margher shi Vidicovats. Hotelu Bristol totna lji apruchea nai ma avutslji oaspits shi di atsea ispeti tu el eara angajat shi orchestarlu al Vasil Hagimanov. Tu aestu hotel multi ori s-ãndridzea avuti prãndzuri, cari huzmicharlji cu paitoni li purta pãnã la casili a avutslor, a tu el eara organizati shi shideri privati, cum shi mini baluri. Hotelu, scljeama, eara reprezentativ, nu mash dupu a lui arhitecturã shi vidzuta di nafoarã, ma shi dupu elita di oaspits.

Tu chirolu ninti di trimburarea a loclui di la anlu 1963, hotelu Bristol eara fãrã problemi, cu totna idghilji clientsã, cu shideri di ninti a prãndzului shi di dupu prãndzu. Dupu vãrã chiro, hotelu lu cheari reitinglu, ca tu el ahurhirã s-yinã shvertseri, criminaltsã, sh-ti atsea politsia di atumtsea, cafinea u proclamã ti nisigurã. La anlu 1982, Machedonia Turist adrã un bun lucru. Ti doi anj hotelu Bristol di zãrtsinã eara renovat di partea a firmãljei ti constructsii Mavrovo, cari u alãsã a lui vidzutã avtenticã di ma ninti. Hotelu nica unã oarã eara dishclis tu meslu ximedru, anlu 1984. Agiumsim pãnã di mari amintatic. Earam meta printsipalã ti tuts turishtsã tu transit, oaspits di statili xeani shi di statili ali Yugoslavia di ma ninti, biznismenj, parmateftsã. Amintãm imigi European shi totna aveam lucru. Sh-tora easti bunã, ma nu easti atsea-atsea – dzãsi sheflu a hotelui Radivoe Petrovich.

Ma iara, di aspectu architectonic aestu obiectu va s-armãnã s-spunã ti arhitectura europeanã di anjlji 1920, cãndu ea ahurheashti s-intrã aoatsi la noi, pi tu a noasti locuri.