Atanas Yioryitsa

ATANAS YIORYITSA

18.01.1932 – 12.05.2012

Loc natal: hoara Ubova, aproapea di Veles (di la anlu 1960 bãna Scopia)

Cãntãtor armãnescu

Di bana

Atanas Yioryitsa easti faptu pi 18 di yanar, anlu 1932, tu hoara Ubova, aproapea di Veles. Pãnã la anlu 1960 bãna tu loclu natal, a dupu atsea, deadun cu familia a lui, vinirã s-bãneadzã Scopia. Vrearea cãtrã muzica armãneascã eara atsea tsi lu bãgã anlu 1962 s-lu reghistreadzã protlu veclju cãntic armãnescu la Radiolu di Scopia, cãnticlu „Piha caftã cashcavalã“. Dupu atsea reghistrã shi alti cãntits armãneshtsã cu tsi arhiva cu muzica armãneascã s-fãtsea tut ma avutã.

Activitãts armãneshtsã

- Un di fundatorlji a protãljei sutsatã armãneascã „Pitu Guli“ di Scopia! - Un di initsiatorlji ti fundari a Ligãljei a armãnjlor dit Machidunii! - Mari alumtator shi activistu ti dishclideari a Redactsiiljei ti emisiili pi limba armãneascã di la Televizia machiduneascã! - Promotor a culturãljei armãneascã! - Promotor a cãntivlui, iholu shi portul armãnescu! Ca persoanã cari u promova vecljul cãntic armãnescu, a tu idghu chiro shi vecljul portu armãnescu, ari partitsipatã la multi festivali folcloritsi armãneshtsã shi machiduneshtsã, shi atsea: Scopia, Ohãrda, Pãrlep, tu hoara armãneascã Molovishte shi tu multi alti locuri iu eara cãlisit. Ari partitsipatã shi la festivali tu xeani: Costantsa-Romãnia, Vidin shi Velingrad - R.Vãrgãria, ãn Beligrad – R.Sãrbia, Tu R.Gãrtsia, R.Albania, a partitsipã shi Fraiburg – R.Germania.

Dupu reghistrarea ma multi veclji cãntits armãneshtsã, d-lu Atanas Yioryitsa, la anlu 1999, cu agiutor a Ligãljei a Armãnjlor dit Machidunii, u scioasi a lui prota audio casetã cu 10 veclji cãntits armãneshtsã shi atsea: „Featã Armãnã“, „Mi alinai pi eleamlu“, „Un lai pui azbuirãtor“, „Nã martsã-mirindi oarã“, „Loai s-ul ved tatãlu a meu“, „Unã vearã, vearã mari“, „Trandafila“, „Voi Armãnj Machidunits“, „Pi atsea dzeanã“ shi „Aidi, pi atsel munti“.

Cu mari vreari cãtrã Fara armãneascã, cu dor cãtrã armãnamea, d-l Atanas Yioryitsa lungu chiro s-alumtã ti cauza armãneascã. Eara initsiator shi un di fundatorlji a sutsatãljei armãneascã „Pitu Guli“ di Scopia, a Ligãljei a aArmãnjlor dit Machidunii, a cu activitãtsli a lui deadi contributsii shi ti fundari a redactsiiljei armãneascã di la Televizia machiduneascã.

Premii:

Ti lucurlu a lui ti cauza armãneascã, ti promovari a vecljului cãntic armãnescu, cum shi ti alumtarea ti tsãneari a limbãljei armãneascã, d-l Yioryitsa amintã shi multi premii, pricunushteri shi placheti. Ashitsi, la anlu 1999 di partea a Uniunea ti limba shi cultura armãneascã di Fraiburg, eara durusit cu plachetã ti „tsãneari shi crishteari a grailui, cãnticlu shi arãdzli armãneshtsã“. Anlu 2000, Fundatsia „Bana armãneascã“ dit Bucureshti lji deadi premii „Om a anlui“ ti contributsia ti dishtiptari a sentimentului natsional la Armãnjlji. Azã, tu arhiva a Televiziiljei machiduneascã, s-aflã multi veclji cãntits armãneshtsã cãntati di d-ul Atanas Yioryitsa, cari zburãscu ti tricutlu a Armãnjlor, ti bana a Armãnjlor di un chiro, cãntits cari zburãscu ti istoria armãneascã.