ADETS TI CÃRCIUN

Dupu sãrbãtoarea Colinde yinea Cãrciunlu. Pi 6 di yianar dixeara, Armãnjlji u ãnsimna sãrbãtoarea Cãrciunlu. Ti atsea sãrbãtoari elji tsãnea preasini, pãnã apirea, ma cãndu va s-dishtipta, prota li la mãnjlji, fatsa shi sh-li aspila oclji.

Traditsia la Armãnjlji eara, prindu Cãrciun, dixeara tuts s-adunã acasã, scljeama familia tutã s-aduna acasã ta s-tsinã deadun. Pi sinia s-bãga multi mãcãri shi poami, cari tsi avea, shi atsea searã s-adra mãcãri cari nu eara purinti. Scljeama purinteatsã nu bãga atsea searã. Adra fisulji, ariz, campiri, bãga peshtsã, adra culac, bãga poami, bamboni, stafidzi, hitsi, nibilbe, uscati purni, cãstãnj, purdicai, meari, scljeama tut tsi nu easti purinteatsã. Sh-fãtsea crutsi sh-di tuti mãcãri bãga ãn gurã. Di cãndu va s-tsina tuts, sinia la Armãnjlji nu s-muta, tuti armãnea pi sinia, ca pistipsea ca cãndu va s-yinã Hristolu lipseashti s-veadã ca sinia easti amplinã.

Unã lumachi di cupaci bãga pi sinia, ama nu aprindea tsearã. Aprindea dzadã ti videalã. Dzadã easti lemnu cu arucinã shi cãndu s-aprindi, ardi ca tsearã. Armãnjlji tsina cu dishclisã ushi ta-s intrã Hristolu, ta s-aducã haraua tu casa. Dzua prindu Cãrciun Armãnjlji avea adeti s-u dishclidã cararea a oilor, cara s-avea vãrã cal ligat, lju scutea caprestul, s-nu hibã ligat, s-nu aibã pravdã ligatã, ushili s-nu hibã ãncljisi. Li dishclidea shi cãrãrli di cãprets, di ducatili, scljeama tuti ushi eara dishclisi prindu Cãrciun.

Unã ahorghea traditsii la Armãnjlji, ti sãrbãtoarea Cãrciunlu eara atsea tsi tu njeadzã noapti purinta apa, la shopat icã la fãntãna. Armãnjlji pistipsea ca ti Cãrciun apili alasã preasini. Dupu pistipsearea a lor, apili atumtsea dãnãsescu ti un momentu, ma canã nu poati s-u ducheascã atsea. Scljeamã Armãnjlji pistipsea ca apa dãnãseashti tu njeadzã noapti, shi atsea easti ligatã cu fãtsearea a Hristolui. Atumtsea agiundzi hãbarea ca Hristolu s-featsi shi dupu atsea ãnchiseashti apa s-curã. Armãnjlji tu apa arca cash icã ghizã, scljeama arca albeatsã tu apa, la shopat icã tu fãntãna. Alantã dzuã tahinima, dzua di Cãrciun, Armãnjlji cãndu s-ascula, prota biea apa, ma dicara va s-la tu fatsa, s-purinta.

Ti Cãrciun cafi unã casã armãneascã eara chischinã, spãstritã ca chelchi, ca yilii. Cum ti Colinde, ashi sh-ti Cãrciunlu, Armãnjlji nu didea dari ti mortsã. Cari frimta tsiva, u didea ti sãnãtati. Dzua di Cãrciun, atselji cari bãna aproapea di bãsearica, s-dutsea la bãsearica, ma cari eara largu, cãndila sh-u aprindea acasã, shi atsea agonjea tahinima. Tu bãsearica babili s-dutsea deadun cu nipotslji, vãrã s-cumnica, vãrã nu s-cumnica. Dupu cumnicãtura s-turna acasã pi prãndzu, scljeama tu dzua di Cãrciun, Armãnjlji iara adra prãndzu iu s-aduna tutã taifã shi atsea ma multu adra piti cu oau, ma adra shi bãcãlvã. Andridzea cãti trei mãcãri, cari cum avea, ma sinia totna eara avuta cu mãcãri. Ti Cãrciun nai ma caracteristic easti friptu purtsel, a s-adra shi supã di gãljinã.

Tu vãrã reghioni, Armãnjlji ti Cãrciun adra ghelã cu moare (verdzu) shi cu carni di bibã, ciumlecã. Ti aestã sãrbãtoari Armãnjlji avea adeti s-ducã oaspits, ma shi s-lã yinã oaspits.

La Armãnjlji, preasinjli ti Cãrciun suntu idghi ca Preasinjli ti Sum Chetru, tsi scljeamã ca lunea, njercurea shi vinirea s-mãcã fãrã untulemnu, martsã shi gioia cu untulemnu, a cafi sãmbãtã shi dumãnicã s-mãcã peshtsã.

Cum ti alanti sãrbãtori, ashitsi shi ti Cãrciunl, Armãnjlji cãnta ahorghea cãntits armãneshtsã!

Cãrciun

Ti multsã anji Cãrciunlu

noi vã- urãm,

ti multsã anji dipriunã,

hrioshi s-bãnamu.

Cãntic ti Cãrciun

Pap Cãrciun, Pap Cãrciun,

la casã di om fucarac,

s-bitisi farina ãn sac,

shi nu-avem s-tsa dãm culac.

Pap Cãrciun, Pap Cãrciun,

pit tuti dzenuri, pit tuti agãri,

nã apustusim cicioarili

Pap Cãrciun.

Pap Cãrciun, Pap Cãrciun,

tuti sãptãmãnjli

nã freadzim mãnjli,

s-adunam granurle

Pap Carciun.

Pap Cãrciun, Pap Cãrciun,

fãtsem lucurlu a xenlui,

agrul a biljelui,

Vitleemu steaua a vasiljelu,

Pap Cãrciun.

Pap Cãrciun, Pap Cãrciun,

pit tuti cãrãri,

noi tsã cãntãm cãntari

shi tsã ardem tseri.

Armãnjlji avea traditsii interesantã, scljeama di la Cãrciun pãnã di Tafoti, tu dzãlili cãndu nica nu eara pãtidzat Hristolu, nu inshea noaptea nafoarã shi nu dishclidea usha cã taha yinea caracandzanji. Shi apa tsi la armãnea di noaptea tu ghiumi nu u biea tahinima cã vrea s-eara pãngãnitã di caracandzã.