Adets la ficiorlji di un an pana la shapti anji
Njiclu ahurhea s-imna di nau meshi, cari cum, vara ahurhea cama agonja, vara cama amanat, pan di un ana shi dzumitati. Vara stamana, njiclu sa scula, cadea, ca alj eara fraca. Shi depoaia, di cara tritsea vara stamana, babili ( maili ) loa ndoi ficiurits s- aduna ndau leamni cu cari lu ancarca njiclu. Ficiurutslji, lu acatsa njiclu di mana, shi lu adutsea acasa. Acasa njiclu al baga pi prag cu tuta sartsina shi alj tiljea funea pi prag, ta s-alj fuga frica ti imnari a ficiorlui. Deapoia alj adra culac ( prestapulka) - prastapulka, ca cum alj dztsea Armanjlji. Culaclu lu adra feata cari avea parintsa, dada cu tata. Feata cari al frimta culaclu, al dutsea culaclu pit hoara, ca njiclu ahurhi ta s-imna.
Cu imnarea, njitslji scutea shi dintsa, vara cama ayonja , vara cama amanat. Cari prota va-al videa dintili a njiclui, al didea dintili cu para di asimi, ta s-alj hiba dintsalji a njiclui sanatoshi ca heru shi albi ca asimi. Deapoia , s-hirbea garnu ti protlu dinti. Cum hirbea garnul, ashi shi njiclu s-alj scutea dintsalji cama ayonja shi cama lishor. Deapoia pitritsea feata, de al didea garnul pit hoara.
Cu zburari , njiclu ahurhea di la un an di dzali. Cari amana cu zburarea, a lui alj didea apa dit chipur, ta s- zburasca njiclu cama ayonja shi cama lishor.
Cum crishtea njitslji,oara tuta u tritsea cu babili ( maili), ca maninti bana deadun taifili tuti . mamanjli nu avea oara cu ( ti ) njitslji, ca sh-avea huzmets, a soacra shidea cu nipotslji. Ti atsea , tuta shteari tsi u avea njitslji, la yinea di la babili ( maili ) shi papanjlji.
El la spunea cantits, pirmifi, ngucitori, alj anvitsa s-misura.
Pan di sheasi – shapti anji, ficiorlji eara cu babili 9 maili) shi altu lucru nu avea dicat agiucarea. Ficiorlji Armanji s-agiuca pi patama ica sirinji, nacarijevo.