ACTIVITÃTS CULTURALI TU MACHIDUNII

Multsã anj napoi, tu Machidunii s-organizeadzã activitãts culturali cari alãsarã semnu la Armãnjlji. Unã di ma importantili easti manifestatsia culturalã “Dzãlili a culturãljei armãneascã”. Ãn cadur alishtei manifestatsii, Sutsata a scriitorlor shi a artishtsãlor Armãnj dit Machidunii organizeadzã simpoziumi, festivali ti cãntits shi ti poezii, expozitsii cu picturi, promovari nali cãrtsã, revii di modã shi ashi ma anclo. Mari shi importantã manifestatsii, cari Armãnjlji dit Machidunii u ashteaptã cu mari harau easti shi Festivalu ti nali componati cãntits armãneshtsã (folc shi pop), “Fãntãnã di malãmã”, di iu inshirã multi nali cãntits armãneshtsã, a s-promovarã shi multsã tiniri cãntãtori Armãnj. A cu scupo s-nu chearã shi veclili cãntits armãneshtsã, grupa di cãntãtori Armãnj “Gramosteanj” cafi an, traditsional organizeadzã Festival internatsional sum numa: “Ti sum Chetru tuts tu munti”. Aestã grupã di cãntãtori deadi mari contributsii ti anyieari shi promovari a cãntitslor dit zãmani, cu tsi ãnyie shi vecljul iho armãnescu. Idghea ashitsi shi grupa di cãntãtori "Armãnj pirifanj" cu organizarea a festivalui internatsional "Cãnticlu nã leagã" da mari contributsii ti tsãneari tu banã a vecljlor cãntits armãneshtsã, pit cari putem s-anvitsãm shi unã parti di istoria armãneascã.

Di la anlu 2016, sutsata armãneascã Integra Nau organizeadzã Campuri di vearã ti limba shi cultura a Armãnjlor, publicheadzã cãrtsã, organizeadzã evenmenti culturali, partitsipeadzã tu andridzearea a Strateghiljei a Guvernului "Unã sotsietati ti tuts", adarã contacti intenzivi cu institutsiili di stat cari s-ocupã cu ãndrepturli a comunitãtslor minoritari, ljea parti activã tu adutsearea a nomurlor ligati cu ãndrepturli a minoritãtslor shi multi alti. Tu anjlji dit soni, an cadur a manifestatsiiljei “Dzatsi dzãli di Republica di Crushuva”, unã dzuã easti ampãrtsãtã ti promovari shi afirmari a istoriiljei, cultura shi folclorlu armãnescu.