Constantin Belemace
Di Wikipedia, Entsiclopedia liberã
Constantin Belemace easte cunuscut shi ca trubadurlu armãnescu, ti scriare-a nai ma importantului cãntin armãnescu "Dimãndarea Pãrinteascã" tu Bucureshci tu anlu 1888. Familia al Belemace didea multsã martyri armãneshci, anamisa di cai easte shi preftulu Haralambie Balamaci di tu Arbinishie cai le-fundã protsle sculiur armãneshci shi arbinisheshci tu Arbinishia. Constantin Belemace easte faptu Molovishci, ningã Bitule pi 1 di Avgustu 1844 shi ãnveatsa sculia primarã tu hoara-a lui, a dupu atsea fudzi ãn Biligrad ta s-u continueadzã educatsia. Tu anlu 1837, nãs fudzi Bucureshci iu u-disfeatsi restaurantulu "Machedonia", loc iu va s-adunã inteleghentsia armãneascã tu Romãnia, anamisa di cai shi: Andreilu al Bagav, propagatorlu romãnescu Apostol Mãrgãrit, Tashcu Bongu Iliescu, sh.a. Anlu 1890 Belemace s-toarnã tu Machedonia, shi tu Bitule easte bãgat ti economistu tu Litseulu armãnescu dit Bitule. Muri Bitule pi 21 di Mai 1932 shi ira ãngrupat pi "Mirmintsãle armãneshci" di Bitule.
Cu fundare-a protsle statur shi sutsãts armãneshci, "Dimãndarea pãrinteascã" al Belemace s-proclãmã ca "Hymna" a Armãnjlor.
[edit] Dimãndarea pãrinteascã
Pãrinteasca dimãndare
Nã-sprigiurã cu foc mare,
Frats di mumã sh-di un tatã,
Noi, Armãnj di eta tutã.
Di sum plocile di murmintsã
Strigã-a noshci bunj pãrintsã:
"Blãstem mare s-aibã ãn casã
Cai di limba-a lui s-alasã.
Cai sh-alasã limba-a lui
S-lu ardã pira-a focului,
Si s-dirinã yiu pri loc,
Sã-lji si-frigã limba ãn foc.
Nãs ãn vatra-lji pãrinteascã
Pi fumealjã s-nu sh-hãrseascã;
Di fumelãi curunji s-nu bashe,
Njic ãn leagãn s-nu ãnfashe.
Cai fudzi di-a lui mumã
Shi dit pãrinteascã-lji numã,
Fugã-lj doara-a Domnului
Shi dultseame-a somnului!"
[edit] Publicatsiur
- Tu "Antologhia armãneascã" al Tache Papahagi dit anlu 1922
- Dimãndarea Pãrinteascã – Editura Cartea Aromãnã - 1990
- Константин Белемаче „Автобиографија“ (tradutsire pi limba machedoneascã), Unia ti Culturã-a Armãnjlor dit Machedonia
- Constantin Belemace "Autobiografia" Comuna Armãneascã "Frats Manakia" dit Bitule, 2007
